Fuente O dumalahon sa City Hall ug Capitol

CEBU, Philippines -  May dakong posibilidad nga dumalahon ang Fuente Osmeña (FO) rotunda pinaagi sa co-management o panagtambayayong tali sa kagamhanan sa dakbayan sa Sugbo ug sa lalawigan, matud pa ni Gobernador Gwendolyn Garcia.

Kini samtang padayon pang gitino karon ang tinuod nga tag-iya sa luna nga nahimutangan sa FO rotunda.

Si Garcia mibutyag nga nagpadayon karon ang negosasyon sa kagamhanang provincial ug dakbayan sa Sugbo aron masulbad ang maong isyu .

Sayo niini ang Kapitolyo miangkon nga ang FO rotunda iya sa kagamhanang probinsyal, samtang ang City Hall miangkon usab nga kagamhanan sa dakbayan maoy tag-iya sa maong luna.

Miingon ang gobernador   nga mag-abot na usab unya sila si Cebu City Administrator Jose Marie Poblete ug Capitol Consultant on Information, Revenue Generation and Compliant Rory John Sepulveda kalabot niining isyuha.

Ang gobernador miingon nga posibling hisgutan usab sa maong meeting sa duha ka abogado ang posibling co-management sa nahisgutang luna tali sa City Hall ug sa Kapitolyo.

Hinuon wala pa ibutyag sa gobernador ang tukmang petsa nga mahilot sa hingpit ang maong isyu kay mag-agad kini sa resulta unya sa panagtagbo pag-usab ni Poblete ug Sepulveda. (BANAT NEWS)