CEBU, Philippines - Gituman sa mga vendor sa merkado publiko sa Tabunok, dakbayan sa Talisay ang ilang bahad nga mag-rally ngadto sa city hall kung ugaling pabalhinon gyud sila ngadto sa bag-ong merkado sa barangay Lagtang.
Mikabat ngadto sa 300 ka mga vendor ang naglakaw gikan sa merkado sa Tabunok paingon ngadto sa city hall mga alas 7:00 sa buntag diin ilang gipadayag ang daku nilang pagsupak sa plano sa siyudad sa pagpabalhin kanila ngadto sa bag-ong merkado.
Kahinumduman nga sa milabay’ng semana si Mayor Socrates Fernandez mipadala na og pahibalo ngadto sa mga vendors nga gihatagan sila og usa ka buwan aron mangandam alang sa ilang pagbalhin karong Mayo 28, 20011 sa bag-ong merkado sa Lagtang.
Ang maong mga vendors nagsul-ob og itom nga t-shirt ug nagbutang og puwa nga ribbon sa ilang mga bukton pagpakita sa ilang pagprotesta.
Si Marivic Lasquite ang bise presidente sa fish section nagkanayon nga supak gyud sila nga ibalhin tungod kay nabalaka silang pipila lang ang moadto sa bag-ong merkado tungod sa ka tuyuon niini.
Si Fernandez sa iyang bahin, nagkanayon nga iyang gisuwat ang tanang mga argumento sa mga vendors nganong dili sila gustong mobalhin.
Ang karaang merkado daling maadtoan sa mga residente sa 22 ka barangay sa siyudad ug sa silingang lungsod ug barangay sama sa Minglanilla ug barangay Pardo sa dakbayan sa Sugbo.
Ug gawas niini ang merkado sa Tabunok kausa lang sakyonon kompara ngadto sa Lagtang nga kaduha sakyon. Kagahapon ang mga opisyal sa siyudad mipahigayon og tigom diin gituki nila ang kabahin sa maong problema. (BANAT NEWS)