CEBU, Philippines - Napili si Cebu City Mayor Michael Rama isip pangulo sa Regional Development Committee sa tibuok Kabisay-an atol sa eleksiyon kagahapon nga gipahigayon sa Marco Polo Plaza. Ang kalihukan gitambungan sa tulo ka chairmen ug co-chairmen sa Regional Development Councils sa rehiyon 6, 7 ug 8.
Si Rama ang pangulo sa RDC-7 samtang si Gob. Victor Tanco sa lalawigan sa Capiz sa RDC-6 ug Gob. Carlos Jericho Petilla sa lalawigan sa Leyte sa RDC-8.
Gikalipay ni Rama ang pagpili kaniya isip representante sa Kabisay-an ngadto sa National Economic Development Authority Board kauban sa mga sakop sa gabinete.
Kini bisan iyang giisip nga dugang responsibilidad isip mayor ug pangulo sa RDC-7.
Matud pa ni Rama nga nagpakita lang kini sa dakung pagsalig sa ubang rehiyon sa iyang pamunoan hinungdan nga sila nagka-uyon sa pagduso kaniya nga maoy modala sa ilang tingog ngadto sa kauluhan. (BANAT NEWS)