Teller sa bangko naghikog

CEBU, Philippines -  Usa ka 29-anyos nga dalagang teller sa bangko ang giingong naghikog sa wala pa matinong rason kagahapon pasado alas-5 sa kaadlawon sa barangay Colawen, sa lungsod Argao.

Ang biktima mao si Ivy Cope Montañez, nagtrabaho isip usa ka teller sa Rural Bank Cebu South sa siyudad sa Carcar.

Base sa imbestigasyon sa Argao Police Station, nakit-an ang dalaga sa usa ka Boy Panerio nga nagbitay na kini sa usa ka puno-an sa mangga pasado alas-5 sa kaadlawon.

Si PO1 Bernard Banogon, desk officer sa Argao Police Station nga gikahinabi sa Banat News nagkanayon nga adunay nakuhang suicide note ang mga ginikanan sa dalaga.

Apan ang mga ginikanan nga ilang gikahinabi nagkanayon nga wala silay namatikdan o naghisgot man lang ang anak og problemang gihambin. Dugang pa ni Banogon nakit-an sa amahan sa dalaga ang “suicide note” sa kwarto sa namatay nga nangayo og pasaylo ngadto sa iyang mga ginikanan ug mga kahigalaan sa iyang gibuhat.

“I’m sorry but this is my final option. Always remember that I am always at your side. I love you so much,” tipik sa mensahe sa biktima alang sa iyang pamilya.

Gilakip usab niini sa iyang suwat nga kinahanglan ilubong siya karong Mayo 22, Domingo ug isulod siya’g puti nga lungon ingon man kung asa nga punerarya dad-a ug sa sam-ang ilubong.

Samtang iyaha usab gipahimangnoan ang iyang mga kabanay ug kahigalaan nga ang kamatayon dili katapusan kondili sinugdanan sa bag-ong kinabuhi.(EIM) (BANAT NEWS)