CEBU, Philippines - Mapasalamaton si Gob. Gwendolyn Garcia kang Mayor Michael “Mike” Rama sa pagpanindot sa bag-ohay lang nga giablihan sa publiko nga Plaza Independencia ug ang pagpanindot sa Fort San Pedro diin usa siya sa mga dinapit sa opening niini.
“Ang Plaza Independencia usa ka matahom nga parke nga mohulagway sa Philippine history,” asoy ni Garcia kinsa nagtuong makatabang kini pagpalambo pa sa turismo sa dakbayan. Sumala pa ni Garcia sama sa siyudad sa Sugbu, ang Kapitolyo migahin gyud og pundo aron makonserbar ug pagpalambo ang cultural heritage sa tanang dakbayan ug munisipalidad sa lalawigan.
Ang lalawigan mipahigayon og actual inventory sa tanang tangible ug intangible heritage sa Sugbo ug nagpahigayon na og pagtuon ang lalawigan alang sa planong pagbutang og heritage parks sa Oslob, Moalboal, Alegria, Dumanjug, Boljoon, Borbon ug Sogod.
Samtang ang kaniadto hanap pa sa panas nga kaugmaon sa Cebu Zoo diha sa Sudlon sa barangay Lahug daw mahatagan na og direksyon human mopahibalo si Garcia nga adunay mapaabot nga kalamboan ang maong pasilidad. (BANATNEWS)