CEBU, Philippines - Nasakiyo sa wala hiilhing mga tulisan ang kapin P11 mil sa gitulis niining litsonan og manok sa barangay Poblacion Ward 4, sa lungsod sa Minglanilla sa miaging buntag.
Ang nabiktima mao si Marley Beyoy, 20, nga taga barangay Lipata, Minglanilla nga maoy kahero sa Sr. Pedro Litson Manok.
Si SPO1 Joel Nebrija sa Minglanilla Police Station nagkanayon nga nanghugas sa mga plato si Beyoy niadtong higayona dihang misulod ang tulo ka wala hiilhing mga lalaki nga nagtaptap sa ilang mga nawong ug mition og ice pick sa liog sa biktima uban sa pagdeklarar nga tulis.
Gimandoan dayon ang biktima sa paghatag sa tanang halin sa tindahan nga mikabat og P11,571 gikan sa hunos.
Human makuha ang salapi kalmado ra kaayo kining nanglakaw pahilayo sa maong lugar. Sa pagkakaron padayon pang gipangita sa kapolisan ang mga tulisan. (BANATNEWS)