Kanhi OFW gipatay sa kapuyo

CEBU, Philippines - Patay nang miabot sa tambalanan ang usa ka babayeng kanhi Overseas Filipino Worker human kini giunay og pusil sa iyang kapuyo diha sa Purok Saging, sa barangay Gun-ob dakbayan sa Lapulapu sa milabay’ng buntag.

Ang biktima mao si Chona Labajo, residente sa maong dapit samtang ang suspetsado mao si Julius Dungog, 29, kauban pagpuyo sa biktima sa maong dapit kaniadto.

Sa pasiunang imbestigasyon sa kapolisan nasuta nga kanunay maglalis ang duha hinungdan nga milayas si Labajo ug didto na kini misaka sa iyaan niini.

Matud pa ni SPO1 Manolito Abellanosa nga pangabubho ang hinungdan sa panag-away sa duha hinungdan nga gipatago sa iyang amahan ang biktima sa panimalay sa iyaan nga ilaha ra usab silingan.

Gikatakda unta nga mag-atubang ang duha sa barangay kapitan sa sunod adlaw apan giapas kini sa suspetsado.

Dugang pa ni Abellanosa nga mosulod na unta sa panimalay ang biktima aron matulog apan miabot ang suspek ug mitumaw na usab ang panaglalis sa duha nga miresulta sa pagpusil ni Dungog ngadto ni Labajo.

Matud pa ni Abellanosa gidul-itan sa suspek pagpusil ang ulo sa biktima ug daling miikyas.

Gisuwayan og dala sa mga residente sa maong dapit ngadto sa tambalanan ang biktima apan gideklarar kini nga patay na pag-abot didto.(BANATNEWS)