CEBU, Philippines - Patay ang usa ka lalaki human dunggaba makadaghang higayon sa kaugalingong igsuon niini sa miaging adlaw pasado alas-8 sa gabii sa sitio Mahayahay sa barangay Apas dakbayan sa Sugbo.
Ang biktima mao si Jose Leogardo Gala, lumolupyo sa maong lugar, samtang ang suspek mao si Climaco Gala Jr., 53, usa ka retiradong sundalo nga igsuon sa biktima.
Base sa imbestigasyon nga gipanguluhan ni PO3 Mario Ariel Nator sa Homicide Section sa Cebu City Police Office (CCPO) naghigda na daplin sa dalan ug nagkadugo ang biktima.
Aduna kini samad sa ubos nga bahin sa iyang duha ka mga bukton ingon man dapit sa iyang siko ug sa tuong bahin sa abaga.
Ang mga sakop sa Emergency Rescue Unit Foundation (ERUF) mao nay mideklarar kaniya nga patay na.
Matud pa ni Nator sa pakighinabi sa Banat News nga usa ka silingan sa biktima nga si Sgt. Joel Celerio maoy mitawag sa CCPO kabahin sa pagpamusil sa ilang lugar.
Si Celerio mibutyag sa kapolisan nga nakugang siya dihang nakadungog siya og kusog nga syagit gikan sa atubangan sa panimalay sa suspek ug sa biktima ug dali siyang migawas sa iyang panimalay aron pagsusi.
Mao nalay iyang nakit-an nga gidunggab sa suspek ang biktima makadaghang higayon hinungdan sa iyang pagtawag sa kapolisan.
Si Police Community Relations Division sa Police Regional Office-7, SPO2 Edgar Eyac kinsa nagpuyo ra usab sa maong dapit ug off-duty niadtong tungura dali usab nga miresponde ug maoy nakasikop sa suspek kinsa wala moikyas.
Si Celerio positibong mitudlo sa suspek nga mao ang mamumuno sa biktima sumala pa sa imbestigasyon sa Homicide Section.
Matud pa ni SPO4 Alex Dacua ang lead investigator sa maong kaso mibutyag sa Banat News nga parehong nakainom ang duha, dugang kasayuran nga ilang nakuha mao nga kaniadto pa kanunay nang maglalis ang duha ilabi na kun mangahubog. (EIM) (BANATNEWS)