CEBU, Philippines - Sugdan karong Mayo 16, 2011 ang pagpatuman sa Towing Ordinance sa dakbayan sa Lapulapu diin ang tanang matang sa sakyanan nga magpataka og parking guyoron ug i-impound kini sa usa ka yarda.
Matud pa ni Mayor Paz Radaza human sa public hearing nga gihimo sa konseho nga ang mga sakyanang makalapas sa maong ordinansa adto iimpound sa yarda sa motorpool sa dakbayan diin adunay gilapdon nga 2,000 metro quadrado.
Sa maong ordinansa ang mga sakop sa kapolisan, SWAT team ug CTMS maoy moimplementar uban sa One Stop Towing Services nga maoy gi-hire sa kagamhanan nga moguyod sa mga malapasong sakyanan.
Ang taripa o multa sa makalapas naglangkob sa mga sakyanan nga adunay gibug-atong 12,000 libras paubos, P1,500 kung adlaw; kung gabii, P2 mil.
Impounding fee alang sa mga motorsiklo, P100.00 sa unang adlaw ug P50.00 dugang matag adlaw Impounding fee alang sa mga light vehicle P300.00 sa unang adlaw ug P150.00 dugang matag adlaw.
Impounding fee alang sa mga 12,000 libras P500.00 sa unang adlaw ug P300.00 dugang matag adlaw.
Ang dili malukat nga sakyanan sulod sa 60 ka adlaw imbargohon sa siyudad ug ipaubos sa usa ka subasta.
Gumikan niini giawhag ni Radaza ang katawhan nga mobasa sa mga gimontar nga signage sa matag lugar o mga dagkong karsada sa dakbayan sa Lapulapu aron dili maguyod ang ilang sakyanan sa mga towing personnel nga gitahasan sa pag-implementar sa maong balaod. (BANATNEWS)