Usa nalumos, laing 1 na-missing sa dagat

CEBU, Philippines - Usa ka batan-on ang gikatahong naanod tungod sa kakusog sa balod sa kadagatan sa South Road Properties pasado alas- 2 sa hapon kagahapon.

Atol ning pagsulat sa balita padayon pang gipangita si Rodney Claritad, 23, molupyo sa barangay Cogon-Pardo ning dakbayan.

Sa report sa DyAB, si Cebu City Disaster Coordinating Council executive director Alvin Santillan mibutyag nga base sa iyang nakuha nga impormasyon si Claritad gikatahong naligo sa dagat sa SRP uban sa pipila ka higala. Apan tungod sa kakusog sa balod gikatahong naanod ang tsinelas niini hinungdan nga iya kining gi-ambak sa dagat apan wala na kini mobalik pa og lutaw.

Ang mga kauban ni Claritad wala na makatabang kaniya tungod sa kakusog sa sulog ug sa bawod. Milusad og search and rescue operations kagahapon apan wala pa makaplagi si Claritad.

Samtang patay na nga naabot sa tambalanan ang usa ka 19-anyos nga si Jessie Gabasa, taga sitio Neighborhood, barangay Tabunok sa dakbayan sa Talisay human kini nalumos samtang naligo diha sa usa ka beach resort sa barangay Poblacion, dakbayan sa Talisay kagahapon sa hapon.

Si PO3 Edwin Alvarado, duty desk officer sa Talisay City Police Station mibutyag nga nakaplagang naglutaw na sa dagat si Gabasa alas 12:30 apan nadawat nila ang report gikan sa gwardiya sa Talisay City District Hospital mga alas 3:00 na sa hapon. Matud ni Alvarado nga si Gabasa naglangoy paingon sa dike diha sa beach resort nga dunay gilay-ong 25 metros gikan sa baybayon dihang gikuso-kuso kini sa dagku ug kusog nga balod.   - BANAT NEWS