Gitigbas sa ig-agaw kritikal

CEBU, Philippines - Kritikal ang kondisyon sa usa ka panadero human kini unaya pagtigbas sa iyang ig-agaw didto sa sitio Bakhaw, barangay Heminsulan, lungsod sa San Francisco, Camotes Island sa miaging gabii.

Si Joel Impas, 39, residente sa maong dapit nakaangkon og mga samad tinigbasan sa iyang lawas dihang gihabas kini og sundang ni Bienvenido Impas, 48, usa ka mag-uuma nga silingan, ug ig-agaw sa biktima.

Base sa imbestigasyon sa kapolisan, nasayran nga si Joel naglakaw sa karsada pauli sa ilang balay dihang nasakpan niya sa akto si Bienvenido nga namato sa ilang balay.

Busa giduol kini sa biktima ug gipangutana nganong namato siya apan matud pa wala motubag ang suspetsado unya misulod kini sa ilang balay ug sa paggawas niini nagbitbit na og sundang.

Dihadiha giligid og tigbas niini ang biktima, ug busa walay nahimo ang naulahi gawas sa pagpanagang sa sundang sa suspetsado hinungdan nga nabulit sa mga samad ang nagkalainlaing bahin sa lawas niini.

Nailog ra sa biktima ang sundang sa suspetsado ug gitunol kini niya ngadto sa mga tanod nga miresponde sa maong hitabo.

Ang biktima gihatod dayon ngadto sa Dr. Maningo District Hospital samtang si Bienvenido boluntaryong misurender ngadto sa mga tanod nga miresponde sa maong hitabo.

Si Bienvenido gidala sa mga tanod ngadto sa ilang kapitan nga si Marcelo Almacin kinsa mao nay mitugyan sa suspetsado ngadto sa kapolisan sa lungsod.

Si Bienvenido kinsa nagtingkagol na karon sa San Francisco detention cell gitakdang pasakaan og tukmang kaso karong adlawa (Lunes).  - BANAT NEWS