Bngko sa Mandaue gilungkab

CEBU, Philippines - Nasakiyo sa gidudahang mga kawatan ang kapin P40 mil nga kantidad sa mga butang sulod sa China Bank nga nahimutang sa dalan FB Cabahug barangay Centro syudad sa Mandaue.

Ang guard on-duty nga si Nicanor Zuñiga, 29, nga konektado sa Puritan Industrial Security Agency maoy nakabantay nga gisulod na diay ang maong bangko sa wala pa mailhing kawatan.

Sa pakighinabi sa Banat News ni SPO2 Marcos Noval Jr., imbestigador sa Mandaue City Police, mibutyag kini nga matud pa ni Zuñiga nga nianang pag-abot niya sa maong establisamento pasado alas- 8 iyang nabantayan nga nawala na ang giabong sa pultahan sa emergency exit sa tuong bahin sa maong establisamento.

Hinungdan nga gisusi kini ni Zuñiga diha sa bintana nga bildo ug iyang gikatingala tungod kay hayag na kaayo ang sulod.

Tungod niini, daling mi-report si Zuñiga sa kapolisan, sa pakisusi sa kapolisan sa sulod nga bahin sa maong establisamento ilang nasayran nga nawala na ang tulo ka LCD computers nga nagkantidad og P18 mil, nahanaw usab ang usa ka unit sa CPU nga nagkantidad og P20 mil ug ang usa ka AM/FM radio recorder.

Matud pa ni Noval nga sa dihang ilang gipangutana ang branch manager nga si Victor Mayol kun nganong walay gwardiya matag gabii sa maong establisamento mibutyag kini nga aduna na silay gi-install nga security alarm ug security camera hinungdan nga buntag lang sila magbutang og gwardiya.

Apan ang maong security alarm ug camera wala magamit human ang kapolisan walay nakita sa camera kay wala mogana atol sa pagpanglungkab nga nahitabo.

Mipasabot usab si Noval nga wala makadala og kwarta ang mga kawatan tungod kay wala nila maablihi ang vault tungod sa kalig-on niini apan ilang nakita nga nagkagubot na ang mga drawers sa mga tellers nga posibleng adunay kwarta.

Butyag usab ni Noval nga ilang gikatingad-an karun kun nganong nasayod ang kawatan kun kanus-a mahutdan og power ang alarm ug camera ug kun kanus-a walay gwardiya sa maong establisamento.

Dako usab ang pagduda ni Noval nga pasado alas-7 pa nahitabo ang pagpangawat tungod kay ang roving guard nga maoy mosusi sa tanang China Bank outlets misusi diha pagkaalas-singko sa hapon ug wala kini namatikdan.

Gibutyag usab ni Noval nga adunay nakuha nga fingerprints ang Scene of the Crime Operatives (SOCO) ug ilaha na kining subayon.  - BANAT NEWS