CEBU, Philippines - Nahibalik na ang operasyon sa patubig sa barangay Tapilon, lungsod sa Daanbantayan nga gipasirad-an ni Mayor Ma. Luisa Loot niadtong Abril 25, 2011.
Apan niining higayuna, ang barangay na ang nagdumala sa patubig ug dili na ang Tapilon Rural Waterworks and Sanitation, Inc. (TARWASA).
Si barangay kapitan Arturo Conejos mipahibawo sa Banat News nga si Loot ang nimando niadtong Mayo 3 nga ang barangay una ang modumala sa patubig samtang nag-ung-ong pa ang kaso sa korte.
Matud pa ni Conejos nga nalipay kaayo ang mga tawo sa barangay nga nahibalik na ang tubig pipila ka adlaw sa wala pa ang kapistahan sa ilang parokya sa San Miguel Arkanghel niadtong Sabado ug Domingo.
Gipasirad-an ni Loot ang patubig human sa giingong mga kalapasan sa balaud sa operasyon niini ug ingon man ang wala pagkuha og permiso gikan sa munisipyo.
Ang pagpasira ni Loot sa TARWASA misangpot sa pag-atubang niya og kaso nga gipasaka ni Claro Benatiro, ang tsirman sa board of directors sa maong patubig.
Unang nagkabangi ang mga opisyal sa patubig ug sa munisipyo sa dihang nagdumili ang TARWASA pagtugyan sa patubig ngadto sa gitukod nga Daanbantayan Water District. - BANAT NEWS