CEBU, Philippines - Gipaabot sa konseho sa Talisay ang resulta sa imbistigasyon nga gilusad ni konsehal Bernard Joseph Odilao batok sa usa ka barkong nasangad didto sa Pungaton Reef sa barangay Pooc, dakbayan sa Talisay sa miaging semana.
Sayo niini si Odilao nagkanayon nga ang siyudad posibleng moduso og reklamo batok sa VG Shipping Lines nga usa ka roll-on-roll-off ship.
Kini sa dihang nasangad ang maong barko sa Pungaton Reef ug gituohang nakagama kini og kadaot sa maong lugar.
Ang siyudad giingong mokuha og mga diver nga mosusi sa dapit nga nasangaran sa barko, niadtong Abril 26, 2011 ug wala pa hisayri ang kantidad sa coral reef nga nadaot ilawom sa dagat kay wala pa kini ikapasawom sa mga diver nga maoy mokuwenta sa mga kadaot nga nahimo sa pagkasangad sa barko.
Ang maong barko paingon nga mobiyahe ngadto sa Oroquieta City dihang nasabod sa maong lugar.WC (BANAT NEWS)