CEBU, Philippines - Gidunggab ang usa ka drayber sa traysikad sa laing drayber sa traysikad tungod sa wala pagpahulam sa suspek sa traysikad niini kagahapon pasado alas-3 sa hapon sa Santo Niño Corner Missionaries St. sa barangay Suba ning dakbayan sa Sugbo.
Giila ang biktima nga si Rodney Padayao, lumulupyo sa sitio Mahayahay, Suba ning dakbayan nakaangkon og samad dinunggaban sa iyang kalawasan nga nakaingon sa iyang hinanaling kamatayon.
Samtang ang giilang suspetsado nga si Eduardo del Rosario Inoc, 24, mitahan sa iyang kaugalingon ngadto sa mga awtoridad human sa krimen.
Base sa imbestigasyon sa Homicide Section ang biktima gustong manghuwam sa traysikad sa suspetsado apan mibalibad ang naulahi nga miresulta sa ilang panag-away.
Human giuwang sa mga tawo, milakaw ang suspetsado apan mibalik kini ug nagdala na og 12-pulgadang kutsilyo ug gidunggab makadaghang higayon ang biktima.
Si Padayao gidala sa Cebu City Medical Center (CCMC) apan pipila lang ka minuto ang milabay namatay kini. Ang suspek mitahan sa mga barangay tanod. /EIM (BANAT NEWS)