Sanchez Nalubong Na

CEBU, Philippines - Gilubong na kagahapon ang patay’ng lawas ni Bise-Gob. Gregorio Sanchez, Jr. sa Mactan Island Memorial Garden sa dakbayan sa Lapu-Lapu samtang nagpadayon ang hinay nga taligsik.

Kompleto ang pamilya ni Sanchez nga sila si Leonarda, ang iyang asawa ug tulo ka mga anak nga si Grecilda Zaballero, Greco Sanchez ug Gerlaida Spiller. Alas 11:20 sa buntag, gitak-upan ang haya ni Sanchez sa Crystal Palace sa Nivel Hills, Lahug, dakbayan sa Sugbo ug giprosesyon kini padulong sa Kapitolyo.

Susama sa paghatud sa lubnganan ni kanhi presidente anhing Corazon Aquino ang prosesyon ni Sanchez gisakay sa usa ka flat bed truck nga napuno sa mga bulak ug gigwardiyahan sa upat ka naval cadets. Atubangan sa Kapitolyo gisugat sa pipila ka mga opisyal ug kawani nga gipanguluhan ni Bokal Agnes Magpale, ang mihulip kang Sanchez sa pagkabise-gobernador ug gihalad ang usa ka pag-ampo sulod lamang sa napulo ka minutos dayun gidiretso na sa Redemptorists Church alang sa Santos nga Misa.

Usa sa iyang mga empleyado nga si Paolo Toralba ang nangulo sa paglitok sa rosaryo. Ang ig-agaw ni Sanchez nga si Monsenyor Esteban Binghay mao usab ang nangulo sa Santos nga Misa ug upat pang mga kaparian.

Pipila sa nanambong sa lubong nga mga higala ni Sanchez mao sila si kanhi Chief Justice Hilario Davide Jr., Kong. Eduardo Gullas ug Kong. Benhur Salimbangon.

Human niini, ang anak ni Sanchez nga si Spiller ang mipabati sa iyang mensahe ug iyang gihandum kung unsa ka “fighter” ang iyang amahan bisan pa man sa balatian niini nga kanser.

Mapasalamaton usab siya sa pagkabuotan, masinabtanon ug good-provider sa iyang amahan. Nagpasalamat usab siya sa mga tawo nga mitabang kanila. Si Sanchez kinsa usa ka aktibong reservists sa Philippine Navy ug nagranggo og Lieutenant Commander sa 511th Naval Reserve Squadron gihatagan og 21-gun salute sa mga sakop sa Philippine Marines ug Navy.

Ang midawat sa Bandila sa Nasud mao ang kapikas ni Sanchez. Sa wala pa ilubong si Sanchez, ang anak niyang si Zaballero ang mipasalamat pag-usab sa mga tawo nga diha kanunay sa kiliran sa ilang amahan sa buhi pa kini.

Si Zaballero nanghinaot nga ipadayon sa iyang mga kaalyado ang gidamgo niining mga proyekto sa lalawigan sa Sugbo. EIM (BANAT NEWS)