Kolektor sa lending gitulisa'g P6,500

CEBU, Philippines - Nasakiyo sa tulisang de motor ang P6 mil kapin nga koleksyon sa usa ka kolektor sa lending company didto sa barangay Poblacion, lungsod sa Carmen sa miaging hapon.

Ang biktima mao si Anecito Negro Villamor, 25, ulitawo, nga taga San Remegio ug kolektor sa Big-it Finance Corporation nga nagbase sa siyudad sa Bogo.

Samtang ang tulisan gihulagway lang sa biktima nga usa ka batan-ong lalaki nga nagsakay og motorsiklo nga RS-XRM Honda kolor dirty white kansang plate number wala niya matiman-i.

Si PO1 Jason Gulben sa Carmen Police Station mibutyag sa Banat News nga ang biktima mao pay paghuman og kolekta sa mga kliyente niini dihang sa iyang paggawas sa highway kalit lang gitionan ang iyang tingkoy og armas de fuego sa tulisan kinsa mideklarar nga tulis. Dihang misuway siya og lingi kay sil-ingon ang dagway sa tulisan, gipabuthan siya sa armas niini hinungdan nga napugos siya og hatag sa P6,500 niyang koleksyon niadtong tungora.

Human madawat ang salapi misibat dayon ang maong tulisan ug mao karoy gipangita sa kapolisan sa maong lungsod. /WC (BANAT NEWS)