Mosley di kaabot 10-rounds, PNP di mokumpiyansa

CEBU, Philippines - Nangandam na ang kapolisan sa seguridad nunot niining gipaabot nga sangka ni pound for pound king ug Sarangani Kong. Manny “Pacman” Pacquiao ug Sugar Shane Mosley karong adlawa.

Gitambagan hinuon ni Sr. Supt. Patrocinio Comendador, director sa Cebu Provincial Police Office (CPPO) ang publiko ilabina niadtong mga tawo nga magpustahanay nga likayan ang panaglalis aron dili mosampot sa away ug mag-atubang na hinuon sila og kaso.

Nagkanayon siya nga gidili ang sugal apan kung ilaha gyud kining himuon sigurohon lang nila nga dili kini mosampot sa sinumbagay kay mag-atubang na hinuon sila og kasong illegal gambling ug physical injuries.

“It is in the law but they have to make sure nga dili sila ma-filan og illegal gambling sa complainant labi na physical injuries,” sumala pang Comendador.

Samtang iyang gidasig ang iyang mga sakop nga motan-aw nalang sa replay sa away ni Pacquiao ug Mosley kaysa motan-aw sila og live tungod kay posibleng mangigo usab ang mga badlungon tungod sa kamingaw sa kadalanan sama sa mga nasinati sa matag sangka ni Pacman.

Atol sa away karung buntaga gimando ni Comendador sa tanang hepe sa kapolisan sa kalungsoran ug mga component cities nga pangunayan ang pagpatrolya ug paghingusog sa police visibility ilabi na sa mga dapit nga dunay nagpa-pay-per view.

Matud ni Comendador duna say tulo ka teams nga giandam sa mid-North ug mid-South area ug sa Metro Cebu areas nga mopahigayon og checkpoints.

“I will not stay in the office but I will conduct a random visit in chosen municipalities,” matud niya ngadto sa mga tigbalita.

Si Comendador mitataw nga magbutang siya og TV sa headquarters aron ang iyang mga sakop nga mo-duty makatan-aw sa away.

Dihang gipangayoan og panahom si Comendador kabahin sa sangka, masaligon siyang dili molahutay og napulo ka rounds si Mosley.

“The Pacquiao-Mosley fight will not reach 10 rounds. It could also either a technical knockout or a knockout,” matud pang Comendador.

Samtang sa dakbayan sa Talisay, ang bag-ong officer –in charge nga si Chief Insp. Eddie Recamora mibutyag nga bisan paman walay krimeng nahitabo sa Talisay sa mga nangaging sangka ni Pacman dili sila mokompiyansa. (Rey B. Pasaporte , Brenda Batuto ug Rhea Mae Booc sa The Freeman/EIM) (BANAT NEWS)