Kauswagan sa Tuburan way katumanan

CEBU, Philippines -  Si Mayor Democrito Diamante sa lungsod sa Tuburan nga kaalyado ni bise gobernador Gregorio Sanchez nagkanayon nga niining pagtaliwan sa Bise Gobernador dili na usab madayon ang ilang mga proyekto sa lungsod.

Gibutyag ni Diamante nga aduna siya’y proyekto nga gihimoan na nila og resolusyon kini mao ang pagpasemento sa ilang boulevard apan dili na lang siya magdahom nga mapadayon pa ang maong proyekto.

Matud usab sa mayor nga daghan pa unta kaayo og plano ang bise gobernador sa kauswagan sa ilang lungsod diin lakip na niini ang pagpatukod og tulay nga unta gahinan kini sa bise gobernador og P10 milyones.

“Sa karon nga wala na siya (bise gobernador) wala na tay mahimo, daku kaayong kawalan”, ni Diamante pa.

“Nanghinaot lang ko nga ang iyang kalag (Bise Gobernador) duna man gyu’y kalag ang tawo makatabang unta og lamdag sa katawhan sa lungsod”, dugang ni Diamante.

Kagahapon sa gabii ang lungsod sa Tuburan maoy mi-sponsor sa gipahigayong misa diin 350 ka tawo sakay sa upat ka bus nga taga Tuburan ang mitambong niini ug mibilar sa haya sa Bise Gobernador.

Sa laing bahin, si Ferliza Contratista usa sa staff sa buhatan ni Sanchez mibutyag nga karong ala una sa hapon ang patay’ng lawas sa bise gobernador mobiya gikan sa Crystal Palace paingon ngadto sa Redemptorist Church dayon ngadto sa Kapitolyo aron mohapit kadiyot ug dawaton siya sa iyang mga staff dayon paingon ngadto sa Mactan Memorial Garden sa iyang pahulayan sa dayon.

Ang patay’ng lawas ni Sanchez isakay sa six-wheeler truck “flack bed truck” aron makita sa publiko.

Si Contratista midugang nga P5 milyones ngadto sa P8 milyones lakip na sa lungon sa bise gobernador ang package sa pito ka adlaw nga haya niini diha sa Crystal Palace.  (BANAT NEWS)