Pusher milayat sa bintana sa buy bust wa hidakpi sa kapolisan

CEBU, Philippines -  Usa ka 52 anyos nga biyuda nga pusher og shabu abtik kaayong milayat sa bintana sa ilang balay sa buy bust operation ug mikaratil og dagan busa wala hidakpi sa kapolisan didto sa sitio Purisima, barangay Guizo, dakbayan sa Mandaue sa miaging kaadawon.

Hinuon ang anak niining lalaki nga 23 anyos nga nag-ali sa pultahan pagsanta sa kapolisan maoy gidakop ug gibalhog sa bilanggoan.

Ang buy bust operation gipangulohan ni Inspector Wilson Abot, hepe sa Presinto 5 sa Opao Police Station ug nakasaksi dihang mikabad og dagan ang biyuda nga si Victoria Ponte.

Ang anak niini nga si Areston Ponte maoy nagkagulkol karon sa prisohan.

Si PO1 Milven Pelayo sa kapolisan sa Presinto 5 sa Opao Police Station nga nahinabi sa Banat News miingon nga ang buy bust gihimo nila ni Inspector Abot human sa pipila ka adlaw nga pagpaniid nila sa illegal nga kalihokan sa maong biyuda.

Matud pa ni PO1 Pelayo nga sa ilang buy bust nga gilusad uban sa usa ka police decoy, mihana na og tunol og shabu ang suspetsado ngadto sa ilang police decoy.

Apan dihang signiton na unta nila kini, abtik nga mibabag ang anak niini hangtod nga naka-ikid ang suspetsado sa bintana ug sa pagtugpa niini sa yuta mikabad og dagan pahilayo. (BANAT NEWS)