SP secretary sa Talisay suspensohunon

CEBU, Philippines -  Si Talisay City Sangguniang Panlungsod Secretary Emigdio Enjambre Jr. suspensohunon og siyam ka buwan gumikan sa reklamong pagpakauwaw niya sa usa ka tag-iya og machine shop ngadto sa Ombudsman Visayas.

Si Loreto Powao, hingkod, nga taga sitio Nonoc, barangay Tabunok, dakbayan sa Talisay mireklamo kay matud pa gipakauwawan siya ni Enjambre atubangan sa daghang tawo.

Ang nakapabug-at sa maong sumbong mao ang giingon ni Powao nga bisag nangayo na siya og pasaylo kang Enjambre, gitulisok siya niini ug gibaharan pang pasirhan ang iyang shop unya gidad-an pa siya og mga sakop sa Civil Security Unit.

Nagsugod ang maong hitabo dihang si Enjambre giingong nagpaayo sa iyang sakyanan sa Powao Lorielle Machine Repair Shop nga gipanag-iya ni Powao niadtong Marso 13, 2009 sa buntag.

Ang gipaayo ni Enjambre mao ang bolt sa piston brake cylinder bleeder sa iyang KIA Carnival kay gusto niyang mahulbot.

Apan matud pa ni Powao nga mibiya si Enjambre sa shop nga wala magbilin og instruction unsaon paghulbot sa maong bolt.

Kumo kay batid na siya sa maong trabaho, giweldingan ni Powao og handle o gunitanan ang maong bolt aron kini kagunitan aron sayon rang maibot.

Apan matud pa pagkakita ni Enjambre sa trabaho ni Powao, puwerting sukoa niini.

Gawas nga gitulisok siya atubangan sa daghan niyang kliyente ug mga trabahante gibaharan pa siyang pasirhan ang iyang shop.

Nangayo siya og pasaylo ug mihangyo nga ilisan lang niya ang bolt nga nadaot, apan matud pa wala gyud mapuypoy ang kasuko ni Enjambre kaniya. 

Wala pa matagbaw si Enjambre giingong milakaw kini ug mibalik dayon uban na ang mga sakop sa Civil Security Unit sa City Hall.

Gumikan sa kauwaw ug kahiubos ni Powao, mireklamo siya ngadto sa buhatan sa Ombudsman Visayas.

Ang hukom sa Ombudsman, nga nadawat ni Powao niadtong Martes nagtug-an nga sad-an si Enjambre sa gitawag nga “conduct prejudicial to the best interest of the service”, nga silotanan og unom ka buwan ug usa ka adlaw nga pagka-suspenso sa trabaho sa unang higayon, ug kun makalapas pa sa ikaduhang higayon ang silot mao na ang pagkatangtang sa serbisyo.

Apan si Deputy Ombudsman for the Visayas Pelagio Apostol mipalanog og hukom sa pagsuspenso kang Enjambre og siyam ka buwan nga walay suweldo.

Gipasidan-an usab siya nga kun masubli pa ang maong kalapasan pahamtangan pa siya og mas bug-at pa nga silot.

Apan si Enjambre mibutyag sa mga tigbalita kagahapon nga wala pa siya makadawat og kopya sa maong desisyon ug kun anaa man dili pa kini final, matud pa niya.

Midugang siya nga kun anaa na kaniya ang kopya, moduso dayon siya og motion for reconsideration, “ask for prayer for hearing” o mohangyo siya nga mapaminaw pag-usab ang maong kaso batok kaniya.

Kini tungod kay matud pa niya walay hearing nga gihimo ang Ombudsman kalabot sa maong kaso. (WC) (BANAT NEWS)