Masakiton milayat sa lubi patay

CEBU, Philippines -  Usa ka lalaki nga giingong adunay giantos sa iyang panglawas ang miambak gikan sa lubi sa miaging hapon diha sa sitio Agnawe sa barangay Agsungot siyudad sa Sugbu.

Si Teofilo Baguio, 47, nagpuyo sa nahisgutang lugar wala na makaabot pang buhi sa tambalanan human siya giingong miambak sa lubi duol sa ilang pinuy-anan.

Si Rogelio Baguio, 50, maguwang sa namatay miasoy nilang PO3 Geoffrey Gutual, PO3 Victor Ruel Ayuman ug mga kaubanan sa Homicide Section nga samtang siya naglingkod-lingkod sa ilang balay kalit siyang nakadungog og lagubo sa gawas.

Nagdali siyang migawas aron susihon ang gigikanan sa lagubo apan nakurat siya sa dihang maoy misugat sa iyang panan-aw ang manghod nga diha na sa duol sa punoan sa lubi ug wala na maglihok.

Dali siyang nangayo’g tabang sa iyang mga silingan ug gidala sa Cebu City Medical Center (CCMC) apan gideklarar nga patay na.

Midugang si Rogelio ngadto sa kapulisan nga niadtong bulan sa Oktobre sa miaging tuig nalandig sa tambalanan ang iyang manghod tungod sa pag-antos niini sa sakit nga hypertension. (BANAT NEWS)