Duha napusilan, 1 patay

CEBU, Philippines -  Usa ang namatay ug usa ang anaa pa sa tambalanan sa duha ka mga lalaki nga gipamusil sa managlahing dapit sa dakbayan sa Sugbu niadtong Miyerkules sa hapon ug kagahapon sa kaadlawon.

Si Rickey Roy Rosales, 17, taga sitio Ponce 2 sa barangay Carreta nakaangko’g duha ka samad pinusilan sa iyang agtang human siya gipusil pasado alas-5 sa miaging hapon diha sa nahisgutang lugar sa suspetsadong si Mark Dela Cruz nga taga Villagonzalo 2 sa barangay Tejero.

Ang biktima nakabsan pasado alas-8 na sa gabii diha sa Cebu City Medical Center (CCMC) human miungot ang bala diha sa iyang ulo.

Sa pasiunang imbestigasyon sa kapulisan giingong suod nga managhigala ang biktima ug ang suspetsado apan nagsipok ang ulo sa suspetsado human buwagi sa iyang hinigugma ug ang biktima maoy iyang gipahimungtan ug gipusil.

Samtang kagahapon sa alas-2 sa kaadlawom gipusil diha sa Ponce 2 sa barangay Carreta si Albert Bacarisas, 21, usa ka kargador nagpuyo sa nahisgutang lugar samtang ang suspetsado giila nga si Reymark Avenido, 22, nagpuyo ra gihapon sa maong dapit.

Sa imbestigasyon sa kapulisan naglakaw ang biktima padulong mopauli sa ilang balay sa dihang giatangan sa suspetsado ug dihang naagi sa tungod ang biktima gipusil dayon kini. Si Bacarisas nakaangko’g samad pinusilan sa walang bahin sa iyang abaga apan nakadagan apan gigukod gihapon sa suspek apan pag-abot niini dapit sa Hipodromo wala na mosunod ang suspetsado.

Si Bacarisas daling gitabang sa mga tanod ug gidali pagdala sa Cebu City Medical Center (CCMC). Matud sa biktima ngadto sa kapulisan nga duna sila’y karaang panagbangi sa suspek sa dihang nag-abot sila sa Cebu City Jail kaniadto. (BANAT NEWS)