Lola sikop sa buy bust, walo dakpan sad

CEBU, Philippines -  Usa ka lola nga gipasanginlang notadong namaligya og ginadiling drugas ang nasikop sa buy bust operation sa mga sakop sa bag-ong giumol nga task force sa Multi Agency Anti-Drugs Task Force sa miaging gabii diha sa Purok 3, sa barangay Camputhaw siyudad sa Sugbu.

Si Gemma Cabahug Go, 57, gihulagway sa kapulisan nga level 2 nakuhaan og 26 ka gagmay’ng pakete nga gituohang may sulod nga shabu nga mikabat sa P8 mil, mga kagamitan sama sa timbangan, duha ka rolyo nga kinuhaan nga tinfoil, ug uban pa, lakip sa nakuha pagbalik sa kapulisan ang P300 nga marked money.

Si Go nga nahinabi sa mga tigbalita mihimakak nga siya maoy nagtunol sa shabu nga gipalit sa poseur buyer sa kapulisan ug matud pa niya nga wala siya makahibawo nga ang sulod sa bag shabu diay.

Apan iyang giangkon nga dugay nang namaligya og ilegal nga drugas ang iyang banang si ‘Badong’ kinsa wala diha atol sa buy bust operation.

Si Chief Insp. Romeo Santander, hepe sa Criminal Intelligence Branch (CIB) nga nangulo sa maong operasyon nagkanayon nga notado na kaayong mamaligyaay og shabu ang magtiayong Go diha sa naasoy’ng barangay.

Matud ni Santander nga ang anak mismo sa magtiayong Go mikumpisal kanilang taud-taod na gyud nga namaligya ilang ginikanan.

Human sa buy bust ang grupo ni Santander inabagan sa PDEA,CIDG-7 midiretso sila sa sitio Bajo A. Lopez sa barangay Calamba alang sa saturation drive sa usa ka drug den nga miresulta sa pagkasikop sa walo ka mga tawo.

Ang nangasikop mao sila si Abner Quijano, 23, taga Sambag Uno, Aljon Belocura, 41, taga sitio Tugasan Guadalupe, Anthony Dullano, 22, taga San Roque V. Rama barangay Calamba; Ciril Abellana, 43, taga sitio Camalig barangay Labangon; Rolan Agraviador, 19, taga Citilink terminal sa barangay Pahina Central; Renante Habagat, 18, Taga Cabantan barangay Luz; Elmer Oyanguren, 20, taga San Roque barangay Sambag Uno; ug Irene Palla, 20, taga A. Lopez sa barangay Labangon.

Ang walo nakuhaan og trese ka gagmay’ng pakete nga gituohang ang sulod shabu ug mga kagamitan sa paghingos niini. (BANAT NEWS)