CEBU, Philippines - Gituohang gi-carnap ang usa ka motorsiklo nga gi-parking sa daplin sa karsada sa P. Remedio ug dalan A.S. Fortuna sa barangay Banilad, dakbayan sa Mandaue sa miaging hapon.
Si SPO2 Genaro Lambayan sa kapolisan sa Presinto 4 sa Casuntingan Police Station miingon nga ang tag-iya sa maong Honda nga motor, nga si Jimmy Antipuesato, hingkod , minyo , nga taga Talamban sa dakbayan sa Sugbo miingon nga ang iyang itom nga Honda iyang gibilin sa maong dapit kay miadto siya sa buhatan sa iyang asawa nga didto sa sudlonong bahin sa maong lugar.
Apan nakurat nalang ang biktima dihang sa iyang pagbalik nawagtang na ang iyang sakyanan sa giparkingan niya niini.
Matud pa ni SPO1 Lambayan nga gi-aninaw nila ang palibot sa maong lugar sa pagtuo nga ang mga kawatan wala pa makapahilayo sa maong dapit. Matud pa niya nga milungtad gyud og pipila ka takna ang ilang pagpangita kay naabtan sila og lawom nga gabii ug wala na gayud nila igkita ang maong motorsiklo.
Busa si Lambayan kinsa nagtuo nga gi-carnap ang maong sakyanan miawhag sa mga tag-iya og motorsiklo nga di magkompiyansa sa ilang pagbilin sa ilang mga sakyanan bisan asang dapita aron dili madisgrasya sa mga kawatan. (/WC) (BANATNEWS)