Ulitawo gi-buy bust tiklo

CEBU, Philippines - Nadakpan sa kapolisan ang usa ka tawo nga nasakmitan og shabu sa buy bust operation nga ilang gilusad didto sa sitio Asinan sa barangay Mantuyong sa maong dakbayan sa miaging gabii.

Ang nadakpan mao si Richard Latonio, 27, ulitawo, walay trabaho ug nagpuyo sa maong dapit. Ang kapolisan misakmit sa iyang usa ka pakite nga gituohang shabu uban sa kahimanan sa paggamit niini.

Si PO1 Melvin Pelayo sa kapolisan sa Presinto 5 sa Opao Police Station nga nahinabi sa Banat News miingon nga ang team sa ilang kuwerpo mihimo og pagpaniid sulod sa pipila ka adlaw kalabot sa illegal nga kalihokan sa maong suspetsado sa maong lugar.

Dugang pa niya nga ang team nga gipangulohan ni PO2 Eleazar Lllanes mipahigayon og buy bust operation uban usab sa ilang police decoy nga nagpaka-aron ingnon nga pumapalit og shabu maoy nakigsabot sa suspetsado.

Matud pa niya nga sa dihang gitunol na sa ilang decoy ang kuwarta nga bayad sa usa ka pakiteng shabu, giposasan dayon ang suspetsado ug gisikop.

Matud pa ni PO1 Pelayo nga ang kaso nga may labot sa paglapas sa Republic 9165 kon Comprehensive Dangerous Drug Act of 2001 ilang   giandam nga ipasaka batok sa maong suspetsado kinsa kasamtangang nagpahayahay sa prisohan. (WC)  (BANATNEWS)