Nag-wire tapping nakonbikto

CEBU, Philippines - Usa ka warrant of arrest ang gipagawas batok ni Josephine Gonzales ug Alejo Patalinghug parehong molupyo sa barangay Suba ning dakbayan kini human gikatahong ang duha nagpahigayon og illegal tapping sa wire sa kuryente sa Visayan Electric Company (VECO) nga walay pananghid gikan sa maong kompaniya.

Base sa taho sa VECO nga niadtong Nobiyembre 23, 2004 si Patalinghug nakapanag-iya og apartment sa may dalan M. dela Conception sa nahigsutang barangay.

Sila si Josephine ug Arnold Gonzales, Cesaria Gallego, Noel Garsota, Ruel Montede, Amy Ferter ug Edsel Torres ang nangabang ug mi-okupar sa maong apartment.

Apan nasayran sa VECO nga ilegal nga mi-tap ang mga tenants ngadto sa ilang secondary line hinungdan nga ang ilang inspectors uban sa duha ka polis nga sila si SPO2 Arthur Quindal ug PO2 Romwin Matulac mipahigayon og random inspection sa lugar ni Patalinghug.

Didto nasayran sa taga VECO inspectors nga ang wire gitagoan sa mga dahon sa usa ka kahoy nga nahimutang duol sa apartment diin direkta kining mi-tap ngadto sa ilang secondary line.

Sa maong sitwasyon gipahigayon ang voltmeter test ug didto nasayran nga ang wire usa ka buhi ug nagkonektar kini ngadto sa apartment ni Patalinghug.

Ang tanang appliances ug mga kabtangan nga migamit og kuryente gipanglista kini sa VECO inspectors aron ilang masuta kun pila ang deferential billing nga angayang bayran sa nagpuyo sa maong apartment ug sa tag-iya niini.

Human nasayran sa VECO ang maong ilegal nga gimbuhaton misang-at sila og kasong RA 7832 o Anti-Electricity and Electric Transmission Lines/Materials Pilferage Act of 1994.

Niadtong Marso 15, si Judge Sylva Aguirre Paderanga sa Regional Trial Court (RTC) Branch 16 mirekomendar nga ipasikop si Gonzales ug Patalinghug ug ang duha gihukmang mapriso sulod sa unom ka tuig ug usa ka adlaw ug pabayaron og 20 mil nga multa.

Ang akusado gimandoan usab nga mobayad ngadto sa VECO sa kantidad nga 127, 966.24 alang kang Patalinghug samtang 4, 649.55 alang kang Gonzales.

Nasayran sa korte nga mibiya ang duha sa maong lugar ug wala kini makapresentar og mga ebidensya pabor ngadto kanila.

“The unexplained flight of the accused (Patalinghug ug Gonzales) represented a strong suggestion of their guilt”, matud pa ni Paderanga.

Samtang si Gallego ug Garsota na-dismiss sa maong kaso kini human sila mipirma og kasabutan tali sa VECO ug misaad nga ilang bayaran ang ilang differential billing.Ang ubang mga akusado nga napakyas sa pagpresentar og ebidensiya bahin sa ilang habig nagpabilin gihapon kini nga nagtago-tago ug dakponon sa balaod. (/BDB)  (BANATNEWS)