Fireworks display masud-ong sa piyesta sa Mandaue

CEBU, Philippines - Hingpit nga masaksihan sa mga Mandauehanon ug mga dumoduong sa Domingo sa gabii atol sa kapistahan sa dakbayan sa Mandaue ang fireworks display nga gitawag og symphony of fire nga pagahimoon sa bakanteng luna sa reclamation area.

Kini maisip nga kabahin sa mga nag-unang kalihokan nga pagahimoon sa tinuig nga pangilin ni Senyor San Jose nga maoy patron sa dakbayan sa matag Mayo 8 sa matag tuig pinaagi usab sa abag sa Dragon Fireworks nga nagbase sa dakbayan sa Sugbo.

Si Jonathan Gesalem nga maoy vice president ug chief of operation officer sa Dragon Fireworks mipadayag nga ang fireworks display nga molanat og walo ka gutlo, dayag nga masud-ong sa kawanangan.

Ang mga makalingaw ug mabulukong mga fireworks display duyogan usab pagpatugtog sa nagkadaiyang sonata nga mabati sa duha ka FM station sa Sugbo nga mao ang Y101 ug Hot FM.

Gitataw ni Gesalem nga ilang gihimo ang pagpasiugda og fireworks display sa tinuig nga pangilin sa dakbayan sa Mandaue sa tuyo usab nga makatampo sila sa kamabulokon sa tinuig nga pangilin karong tuiga.

Nunot niini ang unang ginang sa dakbayan nga si Mrs. Saraha Cortes nagdapit sa mga molupyo ug dumoduong sa dakbayan sa pagsud-ong sa symphony of fire sa dakbayan nga maoy labing unang pagpahigayon niini sukad sa nangaging kasaulogan sa tinuig nga pangilin sa dakbayan.

Sa nasayran kang Regal Oliva, tresurero sa dakbayan ug sakop sa finance committee sa piyesta karong tuiga, miingon nga sa gahin nga mokabat sa P6.8 milyones nga kantidad para sa maong kalihokan, P4 milyones niini naggikan sa mga donasyon sa pribadong sektor sa dakbayan. (/WC)  (BANATNEWS)