TCIB organisahon pag-usab

CEBU, Philippines - Ang Talisay City Police Station (TCPS) mo-organisa pag-usab sa Talisay City Intelligence Bureau (TCIB) o multiplier force human masuta nga may mga sakop niini nga kaalayado sa mga kriminal.

Si Inspector Hugo Rio Ipong sa pakighinabi sa mga tigbalita kagahapon nagkanayon nga ireporma nila ang TCIB ug ipaubos na nila sa higpit ang screening diin ang dawaton mao lamang kadtong adunay sertipiko gikan sa barangay nga siya walay record nga dautan sa ilang barangay.

Gibutyag ni Ipong nga base sa ilang nahipos nga report , may mga sakop sa TCIB nga naniid sa ilang kalihokan tungod kay giingong kaalyado kini sa mga malapason sa balaod.

Gawas niini adunay kanhi sakop sa TCIB ang nalambigit sa krimen ug naimbargohan nila og armas.

Ang nahisgutang TCIB usa sa suspetsado sa pagpusil patay kaniadto sa gwardiya sa Alfa Executive Homes sa barangay Lawaan III, Talisay.

Gibutyag ni Ipong nga mokabat sa 100 ang gidaghanon kaniadto sa TCIB apan dihang may sakop niini nga nalambigit sa mga krimen, gihunong una kadiyot ang pagpakuyog sa TCIB sa mga operasyon sa kapolisan tungod kay giila nila ang mga dunay dili maayong intensiyon.

Niadtong Lunes, 30 ka mga sakop sa TCIB kinsa wala maapil sa mga gidudahang dautan, mitambong sa meeting nga gipangunahan sa bag-ong officer-in-charge sa TCPS nga si Chief Inspector Eddie Recamora. (/WC) (BANATNEWS)