P3.4M subsidiya sa drayber

CEBU, Philippines - Mokabat og P3.4 milyones ang gahin nga gi-aprobahan sa gobyerno alang sa fuel subsidy sa tanang mga drayber sa traysikol dinhi sa Sugbo ug sa tibuok Central Visayas.

Kini maoy silbing tabang sa kagamhanan aron kaminus-minusan ang epekto sa bug-at nga presyo sa mga produkto sa petrolyo gumikan sa sunod sunod nga pagsaka niini.

Tipik kini sa P150 milyones nga kinatibuk-ang gahin sa programa ni Presidente Benigno Noynoy Aquino III nga mao ang “Pantawid Pasada Program” alang sa 990,514 ka mga rehistradong drayber sa traysikol sa tibuok nasud nga maoy makabenepisyo niini.

Nunot niini si Department of Interior and Local Government (DILG)-7 Regional Director Pedro Noval mi-apod apod na sa implementing guidelines ning maong programa ngadto sa mga gobernador, mga mayor sa kalungsoran ug dakbayan dinhi sa rehiyon 7 lakip na ang ilang mga sakop sa konseho.

Ang mga mayor maoy gitahasan sa DILG subay sa gipirmahang kasabotan niini nga maoy mopili sa mga rehistradong drayber sa traysikol sa ilang tagsa tagsa ka lugar aron maoy makapahimulos niini.

Matud ni director Noval ang mga iduso nga listahan sa mga mayor sa kalungsoran ug dakbayan maoy basihan sa DILG pagkuwenta kun tag pila ang mapahimuslang kantidad sa subsidy sa matag drayber gikan sa P3.4 milyones nga kinatibuk-ang gahin alang niini.

Paniguroon sa DILG nga kadto lang mga rehistradong drayber sa traysikol ang makapahimus niini ug way labot kadtong mga colorum nga sakyanan.

Gimandoan usab ang mga mayor sa pagpahigayon og subsob nga information drive sa dili pa pormal nga i-apod-apod ang maong ayuda ngadto sa matag drayber sa traysikol. (/WC) (BANATNEWS)