Drayber giulo pagpusil patay

CEBU, Philippines - Nabuslot ang ulo sa usa ka drayber sa habal-habal human kini pusila sa wala hiilhing kriminal didto sa sitio Barraca, barangay Poblacion, syudad sa Carcar kagahapon pasado alas 2:00 sa hapon.

Ang biktima nailhan nga si Bryan Agbo, hingkod, ug molupyo sa sitio Tawog, barangay Valladolid, sa maong dakbayan ug usa ka drayber sa habal-habal.

Sa inisyal nga imbestigasyon sa kapolisan sa syudad sa Carcar nasayran nga ang biktima nagpasilong sa usa ka payag sa maong lugar tungod sa kakusog sa ulan niadtong higayona.

Apan kalit lang kining giduol sa usa ka wala hiilhing lalaki ug dayong pusil sa ulo sa biktima.

Ang mga molupyo sa maong lugar kinsa nakadungog sa mga buto sa armas misusi dayon sa gigikanan niini ug nakita ang pagkalup-og sa biktima sa yuta nga naligo sa kaugalingon niyang dugo.

Matud pa ni SPO1 Reynaldo Fuentes nga nahinabi sa The Freeman, nga ang biktima naigo sa ulo nga maoy hinungdan sa iyang hinanaling kamatayon.

Midugang si Fuentes nga ilang nakuha sa crime scene ang tulo ka kabhang sa bala sa wala pa matino nga klase sa armas.

Gibutyag usab ni Fuentes nga ila pang gisusi karon ang motibo sa maong pagpamusil (WC) (BANATNEWS)