Taga media gi-seminar bahin sa human trafficking

CEBU, Philippines - Ang mga sakop sa media nga gilangkuban sa print, radyo ug telebisyon nakakat-on og dugang mga kaalam sa paggama ug pagkuha og mga impormasyon kabahin sa human trafficking human sila gipaubos sa duha ka adlaw nga seminar.

Ang seminar gipahigayon didto sa Nalusuan Island Resort Olango Reef, Cordova, Mactan niadtong Abril 30 ug Mayo 1, 2011.

Ang International Justice Mission (IJM) ug Peace and Conflict Journalism Network (PECOJON) nagtinabangay aron ang maong seminar mahimong magmalamposon.

Ang mga speaker sa seminar mao sila si Atty. Samson Inocencio, deputy field director sa IJM, Cebu, ubos sa PECOJON mao sila si   Charlie Saceda, projects coordinator, Karlon Rama, editor ug publication trainer ug Leah Manriquez, chief of operation

Ang mga tigbalita ug cameraman gitudloan sa mga technique sa pagbalita sa human trafficking ug pagkuha og footage ug mga hulagway sa mga biktima diin kinahanglang matago ang ilang mga ngalan aron maprotektahan ang ilang katungod.

Human sa mga lecture ug briefing, ang mga mitambong sa seminar gipagama og mga output pinaagi sa gipahigayong mock presscon tali sa duha ka mga babaye nga biktima sa human trafficking kaniadto ug karon nahimo nang mga associate advocate, representante sa Department of Social Welfare and Development nga si Emma Patalinghug kinsa usa ka child welfare specialist ug representante sa Social of Divine World nga si Bro. Paul Bongcaras.

Usa sa mga biktima kinsa 12-anyos pa lang ang iyang panuigon dihang gihaylo siya nga patrabahoon og karenderiya dinhi sa Sugbo apan gibaligya diay siya ngadto sa usa ka “mama sang” ug matag gabii dad-on siya sa barangay Kamagayan uban sa ubang mga babaye ug ibaligya ngadto sa mga lalaking nangita og motagbaw sa lawasnong kalipay.

Ang ikaduhang biktima mibutyag nga 16-anyos pa siya kaniadto uban sa laing duha ka menor de edad nga nagpanuigon og 12 ug 14-anyos dihang gipasaligan sila sa midala kanila nganhi sa Sugbo nga patrabahoon isip waitress sa usa ka restaurant apan gihimo diay silang mga dancer sa night club ug ibaligya ngadto sa mga lalaki.

Gawas niini nagumon usab sila sa bisyo sa ginadiling drugas diin ilang gipasabot nga ang ilang paggamit kaniadto sa ginadiling drugas aron dili sila bati-on og kauwaw

Ang duha ka mga biktima miduol kang Bro. Paul ug natabangan silang mapaubos sa rehabilitation hangtud nga nahibalik sa normal ang ilang sitwasyon.

Si Patalinghug nagkanayon nga kasagaran sa mga biktima mga kabus kaayo og pamilya ang uban gikan sa broken home ug ang uban naimpluwensiya sa barkada.  - BANAT NEWS