Paghimo'g holiday sa Abril 27 gihingusgan

CEBU, Philippines - Gihangyo ni Lapulapu City Mayor Paz Radaza ang mga sakop sa Philippine Councilors League (PCL) nga mohimo og resolusyon nga mosuporta sa lakang paghimong National Holiday sa Abril 27 sa matag tuig isip paghandom sa Kadaugan ni Datu Lapulapu batok sa langyaw’ng mananakop nga si Ferdinand Magellan. 

Atol sa pakigpulong ni Mayor Radaza sa PCL nga gipahigayon sa Hoopsdome sa Brgy. Gun-ob dakbayan sa Lapulapu, iyang gipasabot ang kamahinungdanon sa pagdeklarar sa Abril 27 matag tuig nga national holiday isip pagsaulog sa katawhang Pilipino sa kadaugan ni Datu Lapulapu.

Matud ni Radaza kung ang mga kapildihan sa mga Pilipino gihandom matag tuig sama sa Fall of Bataan, Fall of Corigidor, Fall of Tirad pass, Fall of Bisan pass ug uban, walay rason nga dili nato himoong handumon lukop nasud ang kadaugan ni Datu Lapulapu nga maoy giisip nga unang hero sa nasud gumikan sa pakigbatok niini kang Magellan kinsa misuway og daugdaog sa mga Pilipino.

Gumikan niini gihagit ni Mayor Radaza ang mga sakop sa PCL nga gipangulohan karon ni Lapulapu City Councilor Eduardo Cuizon nga mohimo og lakang o resolusyon nga mosuporta sa paghimong piyesta opisyal sa Abril 27 matag tuig sa tibuok nasud.

Samtang si kanhi Cebu Customs District Collector David “Boy” Odilao Jr., ang amahan sa Bahugbahug sa Mactan nga gihimong Kadaugan sa Mactan karon mipadayag sa iyang suporta sa lakang ni Mayor Radaza sa paghimo og nasudnong selebrasyon sa matag Abril 27 pinaagi sa pagka-national holiday sa maong adlaw.

Matud pa ni Odilao nga kung ang nasud kanunay maghandum sa mga kapildihan nga atong naangkon batok sa mga langyaw, angayan usab niini handumon ang kadaugan nga naangkon ni Datu Lapulapu sa pagdepensa sa yuta sa Mactan nga dili maangkon ni Magellan nga maoy hinungdan nga nahitabo ang Battle of Mactan.

Sila si Odilao ug Radaza nanghinaot nga kahatagan kini og pagtagad sa nasudnong kagamhanan pinaagi sa abag sa mga sakop sa PCL ug ni Lapulapu City Lone District Congressman Arturo “Boy” Radaza nga madeklarar ang Abril 27 nga usa ka National Holiday.   - BANAT NEWS