Pagpanag-iya sa Fuente gituki

CEBU, Philippines - Gitahasan na ni Mayor Michael Rama sila si Cebu City legal officer Joseph Bernaldez ug City Administrator Jose Marie Poblete aron maoy makigtigom kang Capitol consultant Rory Jon Sepulveda aron matuki ang isyu kalabot sa tinuoray nga nanag-iya sa Fuente Osmeña Rotunda.

Kahinumdoman nga nangangkon ang Kapitolyo nga sila maoy tag-iya sa Fuente nga kasamtangang gidumala sa siyudad sa Sugbo.

Gipadayag sa mayor nga gusto niya nga ipreserbar ang maong area busa iyang ipadayon ang maayong relasyon ngadto sa probinsya.

Malaumon hinuon si Rama nga makaangkon og positibong tubag kining maong isyu gikan sa Kapitolyo nga gipangulohan ni Gobernadora Gwendolyn Garcia.

Nasayran nga kagatosan na ka tuig nga giatiman sa siyudad ang Fuente ug gihulagway niya nga maayo ang pagdumala niini.

Sayo niini gipadayag sa Kapitolyo nga aduna sila’y mga dokumento nga makapamatuod nga ang probinsya maoy nanag-iya sa maong lugar.

Masaligon si Rama sa liderato ni Garcia , gani aduna na kini kaayohang nabuhat alang sa mga tawo sa siyudad diin usa na niini mao ang pag-bukas sa dalan sa Larsian niadtong milabay’ng buwan.

Gani mapasalamaton si Rama sa probinsya gumikan kay mosuporta kini sa pagpanindot sa pipila ka bahin sa Jones Avenue isip kabahin sa beautification program sa dakbayan.   - BANAT NEWS