Suspek sa tulis sa Cebu dakpan sa Negros Oriental

CEBU, Philippines - Nadakpan didto sa lungsod sa Sindulan, Negros Oriental ang usa sa walo ka mga sakop sa Crips gang nga suspetsado sa pagtulis ug pagpusil patay sa usa ka lalaki sulod sa PUJ sa dalan M.C. Briones ug eskina sa dalan A.S. Fortuna sa barangay Guizo, dakbayan sa Mandaue sa miaging Sabado sa kaadlawon.

Si SPO2 Marcos Noval sa Investigation Detection and Management Bureau (IDMB) sa Mandaue City Police Office (MCPO) nga nahibi sa Banat News miila sa nadakpan didto sa lungsod sa Sindulan sa Negros Oriental nga mao si Brian Ponte.

Matud pa ni SPO2 Noval nga si Ponte nga nagtingkagol na karon sa detention cell sa kapolisan sa lungsod sa Sindulan ilang malakip sa unang pito ka suspetsado nga ilang nadakpan nga gitakdang pasakaan og kasong robbery with homicide.

Ang maong mga nadakpan sa kapolisan maoy suspetsado sa pagtulis patay kang James Lomarda, 22 , nga taga purok Saging sa barangay Gun-ob sa dakbayan sa Lapulapu.

Ang unang pito ka mga suspetsado nga ilang gipaubos sa paraffin test niadtong miaging adlaw ug napasakaan na og kaso ngadto sa korte mao sila si Jophet Cabada Sanchez, 21, taga Jaime compound sa barangay Tipolo, Jerwin Punayan Eudencio, 20, taga Maharlika, Tipolo, Mark Louie Sanchez Cabahug, 20 nga taga Highway Seno sa barangay Guizo, JV Mauricio Bernbales Himpit, 27, taga Basubas compound sa barangay Tipolo, Jhun Casio Tirol, 18, taga Jaime compound sa barangay Tipolo, Argie Salgado Dadula, taga Jaime compound sa barangay Tipolo ug Bonifacio Fuentes, 23 nga taga barangay Bakilid sa maong dakbayan.

Dugang pa ni SPO2 Noval nga sa ilang nahipos nga kasayoran nga ang maong mga suspetsado maoy responsabli sa uban pang mga pagpanulis nga nahitabo sa dakbayan sa miaging tuig ug sa miaging bulan niining tuiga 2011. -

BANAT NEWS