Tanod nagda'g Ingram tiklo

CEBU, Philippines - Gidakop ug gibalhug sa bilanggoan ang usa ka tanod tungod sa pagdala niini og Ingram, usa ka taas nga kalibre sa armas de fuego nga walay lisensya sa publikong lugar didto sa barangay Guadalupe, siyudad sa Carcar sa miaging gabii.

Ang tanod nga nagpahayahay na karon sa prisohan mao si Bonifacio Quilaton, 47, minyo, molupyo sa sityo Manugnaw, ug tanod sa barangay Guadalupe, Carcar .

Si Insp. Reyco Romaguera sa Carcar Police Station mibutyag sa Banat News nga sayo niini nakadawat sila og tawag gikan sa nagpa-ilang concerned citizen bahin sa maong tanod nga nagdala -dala og taas nga kalibre sa armas sa publikong lugar.

Nasayran nga mikurog sa kahadlok ang mga silingan sa maong tanod sa kabalaka nga magpataka kini og pamusil, nga maoy hinungdan nga gisumbong nila sa polis.

Daling mirespondi sila si SPO1 Rolando Bastida ug mga kaubanan ug didto ilang naabtan sa dapit si Quilaton busa gisakmit dayon nila ang Ingram niini nga adunay magazine nga may duha ka bala.

 Gidala nila kini sa ilang buhatan ug human maimbistigar gipasakaan dayon og kaso sa korte gumikan sa paghupot og armas nga way lisensiya.

Ang kapolisan mihimo pa usab og dugang pakisusi ingon man background check sa maong dinakpan

Wala usab ikapasabot sa maong tanod ang hinungdan sa pagtangkil niya og armas de fuego nga way lisensya. (WC)   - BANAT NEWS