Rice costudian gisuspenso ni Gwen

CEBU, Philippines - Gipaubos na ni Gob. Gwendolyn Garcia sa tulo ka bulan nga preventive suspension nga walay sweldong madawat ang acting supply officer ug rice custodian sa Kapitolyo nga mipagawas sa nahanaw nga 35 ka sakong bugas bisan og walay pagtugot gikan sa Provincial Social Welfare and Development Office niadtong nakalabay nga semana.

Sumala pa ni Garcia nga iyang giaprobahan ang 90 ka adlaw nga preventive suspension ni Antonieto Babor base sa rekomendasyon sa iyang consultant on Security Matters, retired Col. Ceasar Veloso nga maoy mipahigayon sa imbestigasyon sa maong kaso.

Kini samtang nagpadayon ang subsob nga imbestigasyon ug paghipos sa mga ebidensya batok niini.

Sigon sa record gikan sa buhatan ni Garcia nga ang preventive suspension nadawat ni Babor kagahapon sa hapon ug magsugod ang iyang pagsilbe sa suspensyon karong adlawa.

Sigon pa sa gobernadora nga gawas sa preventive suspension, iya usab nga giaprobahan ang lakang sa Provincial Attorneys Office sa pagpasaka og kasong qualified thief batok gihapon kang Babor.

Sigon sa buhatan ni Provincial Atty. Marino Martinquilla nga mapasaka ang maong kaso ngadto sa City Prosecutors Office sa higayon nga makompleto na ang ebidensiya ug gikinahanglanon nga mga legal papers. Matud pa sa gobernadora nga nadismaya kaayo siya sa maong empleyado kay wala kini motuman sa iyang mando nga magtinarong sa ilang trabaho alang matarong ang pagserbisyo sa mga Sugbuanon sa kalungsuran. - BANAT NEWS