Sugbo tukora'g training center

CEBU, Philippines - Tungod sa kapopular sa Cebu sa natad nga suroyanan sa mga turista sa tibuok nasud, pipila ka mga langyaw nga sakop sa Hinduja Global Solutions ang mibisita sa buhatan ni Gobernador Gwen Garcia ug nangayo og suporta sa gobernador.

Ang mga opisyal sa maong kompaniya mipasabot sa gobernador sa ilang tinguha sa paghimo sa Sugbo isip usa ka dapit nga umolanan sa education sa mga langyaw.

Kini pinaagi sa pagpatukod og mga training center nga magtudlo ug English language.

Kini tungod kay dili lamang mga Sugboanon ang nagkinahanglang mabansay sa pinulongang Eninglis, kundi bisan ang mga ubang dumuduong sama sa Taiwanese, Thailander ug uban pa.

Ang Presidente ug Chief Executive Officer (CEO)sa Hinduja Global Solutions, nga si Pushkar Misra nagkanayon nga masaligon kaayo sila sa pamunoan ni Gobernador Garcia hinungdan nga gipili nila ang Sugbo alang sa maong proyekto.

Samtang mapasalamaton usab kaayo ang gobernadora sa lalawigan sa Sugbo sa gipasabot sa maong langyaw bahin sa pagpili nila sa Sugbo nga misakar sa ilang mga plano alang sa pagpalambo sa edukasyon.

Kini tungod kay labi kining makapauswag sa dakbayan ug lalawigan kay modugok man ang mga turista dinhi ilabi na kun masud-ong nila nga bisan ang mga langyaw anhi na mag-estudyo sa pinulongang Eninglis.

Ang mga training center posibleng itukod sa lalawigan sa Naga. (BANAT NEWS)