Kompaniyang langyaw ganahan sa Sugbo

CEBU, Philippines - Lain na usab nga langyaw nga negosyante ang buot mobubo og pohunan sa negosyo dinhi sa lalawigan sa Sugbo.

 Kini human makigkita ang mga opisyales sa Harmonic Limited, usa ka non government organization (NGO) kang Gobernadora Gwendolyn Garcia ug mipadayag sa ilang dakong kaikag sa pagpatukod og pipila ka mga negosyo nga may labot sa Communication, Energy ug Agriculture dinhi sa lalawigan.

Matud pa sa Chief Executive Officer Phil Shepherd sa Harmonic nga ila pang tun-an ang uban pang mga negosyo nga ilang padaganon dinhi sa lalawigan.

Sa maong mga patigayon gusto silang mangayo og hinabang pinansyal sa kagamhanan aron kini molampos.

Dugang pa ni Chief Executive Officer Phil Shepherd nga ilang napilian ang Pilipinas nga maoy butangan sa ilang negosyo human nila hisayri nga misaler dinhi ang Business Process Outsourcing.

Samtang sa bahin sa gobernador kini mipasabot nga lisud ang gihangyo sa Harmonic nga mangayo og pinansyal nga tabang sa kagamhanan gumikan kay wala mahilakip sa annual budget sa lalawigan ang paggahin og pundo aron itabang sa maong NGO.

Hinuon adunay gitambag ang gobernadora ngadto sa nahisgutang proponent aron sila makasugod na sa ilang negosyo kun gusto nila. (BANAT NEWS)