Negosyante patukoro'g MRF

CEBU, Philippines - Misugyot si Mayor Michael Rama sa mga dagkong negosyante nga papaliton sila og kaugalingong Material Recovery Facilities (MRF) alang sa ilang mga basura.

Nagkanayon ang mayor nga usa kini ka pamaagi nga makatampo ang mga dagkong balay patigayon bahin sa maayong paghipos sa mga basura.

Matud pa niya nga kung adunay kaugalingong MRF ang mga negosyante, makatampo sila sa pagpakibra sa gidaghanon sa basura nga itapok ngadto sa kasamtangang composting site sa Inayawan.

Samtang gihangop sa mayor ang mga establisamento nga mikooperar sa ilang kampanya sa pagbahig sa basura tali sa malata ug dili malata.

Kini dihang nakita ug nasud-ong niya nga matag establisamento nga iyang sudlan sa panahon sa iyang pagsuroy-suroy , makita niya kanunay nga aduna gyuy basurahan nga gilabelan pag-ila sa sudlanan sa malata ug di malata.

Dugang pa niya nga kinahanglang tumanon gyud sa tanang higayon ang maong pamaagi kay alang kini sa kaayohan sa kalikopan.

Gitataw usab sa mayor nga walay turista nga ganahan mosuroy kung hugaw ang usa ka lugar.

Gidayeg usab ni Mayor Rama ang mga opisyales sa barangay nga mihimo usab sa ilang paningkamot sa pagbahig sa basura.

Nasayran nga aktibo karon ang mga Barangay Environmental Officer sa pagpuwesto sa kadalanan aron masumpo kadtong mga tawo nga mobutang sa ilang mga basura sa dili pa oras nga tingkolekta niini. (WC)(BANAT NEWS)