Nadugtang lawas way foul play
CEBU, Philippines - Nasuta sa kapolisan ug sa kabanay sa tawong nadugta ug giulod na ang lawas nga walay foul ang kamatayon niini sulod sa ilang balay sa Windfields Subdivision sa barangay Tulo-Tulo sa lungsod sa Consolacion sa miaging adlaw.
Si PO3 Alin Garciano sa Consolacion Police Station nagkanayon nga si Joseph Estrera, 44, minyo , gituohan sa iyang pamilya nga giatake sa alta presyon o hypertension samtang nag-inusara sa ilang balay niadtong Semana Santa.
Nasayran gikan sa kabanay ni Estrera nga gihatdan kini og pagkaon sa iyang mga anak, dihang layo pa sila sa ilang balay nanimaho na pag-ayo ang palibot niini.
Dihang didto na sila sulod sa balay, nasuta nila nga nadugta na ang lawas sa ilang amahan ug giulod na kini.
Ang pamilya ni Estrera didto sa ilang usa ka balay sa barangay Lahug, dakbayan sa Sugbo niadtong Semana Santa ug ang namatay mao ray nahibilin sa ilang balay nga bag-ong napalit sa sulod sa Windfields Subdivision sa Consolacion.
Si Evelyn Estrera ang asawa sa namatay walay laing nasayrang hinungdan sa kamatayon sa iyang bana gawas sa balatian sa lawas nga gihambin niini sulod na sa dugay’ng panahon.( /WC) (BANAT NEWS)
- Latest
- Trending
