Iring ug di si Abao ang gipusil ni Ramirez
CEBU, Philippines - Nasuta sa prosecutor nga nag-atiman sa kaso ni Mayor Ricardo Ramirez sa lungsod sa Medellin nga iring ang gipusil sa mayor apan mitipas ang bala ug didto moigo sa usa sa bahin sa lawas sa iyang bata-bata nga misangpot sa kamatayon sa naulahi.
Si Provincial Prosecutor Joel Noel Lawas dinhi mobase ning maong kamatuoran hinungdan nga gikan sa kasong homicide gihimong reckless imprudence resulting to homicide nalang ang kasong gipasaka batok kang Ramirez.
Gitutok ni Noel ang iyang findings gikan sa pamahayag ni Geruncio Campomanes, kauban sa biktimang si Edilberto Abao, kinsa mipamatuod nga sa wala pa mabugtoi sa kinabuhi ang naulahi, mikompisal kini kaniya nga iring maoy gitirohan sa mayor niadtong higayona, apan siya (Abao ) maoy naigo.
Ang findings ni Noel gisuportahan usab ni acting provincial prosecutor Joseph Bercelis. Si Abao maoy hepe sa security personnel ni Ramirez kinsa labing suod sa mayor.
Daghan ang mga sirkumstansya sa mga ebidensya nga nakapalig-on sa pagpagaan ni Noel sa kasong atubangon ni Ramirez sa hukmanan gumikan sa mga pamahayag sa mga testigos nga nagpamatuod nga wala tuyoa sa mayor ang pagpatay kang Abao. (/WC) (BANAT NEWS)
- Latest
- Trending
