Tulisang namiktima'g ahente nakaigo na usab

Si Chemuel Laride, 28, taga barangay Magay sa lungsod sa Compostela ahente sa San Miguel Beer nawad-an sa iyang relo nga Seiko ug cash human siya gitulis sa duha ka wala mailhing tawo.

Si Laride uban sa iyang delivery boy naghatud og kinahon nga beer sa usa ka tindahan diha sa barangay Dawis Sur sa lungsod sa Carmen diin nahitabo ang tulis misaysay sa kapolisan nga samtang siya nagpaabot diha sa waiting shed kalit lang miabot ang duha ka lalaking luwan og motorsiklo ug nagpakaaron ingnon nga kostumers diha sa tindahan nga duol sa iyang nahimutangan.

Usa sa duha ka tulisan ang miduol kaniya ug mition og wala matinong kalibre sa armas ug miingon “ayaw nalang og palag, ayaw nalang og sukol, kwarta ray amo!” samtang ang usa nga kauban maoy look-out.

Ang mga suspetsadong tulisan mikuha sa gold plated nga Seiko nga relo nga nagkantidad og P4,320 ug kinolekta nga moabot ngadto sa P18,781. Human milampos ang mga tulisan daling mipasirit sakay gihapon sa motorsiklo nga XRM nga walay plate number paingon sa dakbayan sa Danao.

Samtang sa pikas bahin, tulo usab ka biktima ang nawagtangan sa ilang mga butang ug cash human sila gitulis sa duha ka lalaking nagsakay gihapon og motorsiklo diha sa barangay Lipata sa lungsod sa Minglanilla niadtong Huwebes sa hapon diha sulod sa usa ka kan-anan.

Ang drayber sa Pepsi delivery truck nga si Jionebert Sabelo, 25, taga barangay Uling sa dakbayan sa Naga gikuhaan og mga tseke nga nagkantidad og P38,248.

Ang iyang helper nga si Roel Carvajal, 27, taga barangay Pakigne, Minglanilla gikuha usab iyang pitaka nga dunay sulod nga I.D’s.

Giapil pagtulis sa mga tulisan si Gil Yap, 31, nagpuyo sa no.32 Residencia Tuscania, Guadalupe dakbayan sa Sugbu nga maoy tag-iya sa maong kan-anan nakuhaan usab iyang belt bag nga dunay sulod nga nagkalain-laing bank cards ug kwarta nga P300 ug identification cards.

Matud ni Sabelo sa kapulisan nga nagkaon sila niadtong higayona sulod sa karenderya dihang miabot ang usa ka kolor pula nga XRM motorsiklo nga walay plate number ug ang angkas mikanaog ug miduol kanila dayon mideklarar og tulis dungan sa pagtion og wala matinong kalibre sa armas ug gikuha ang tanang tseke.

Dayon gisunod og duol si Carvajal ug si Yap ug gipangayo ang ilang mga pitaka ug pagkahuman daling misibat paingon sa dakbayan sa Talisay.

Ang kapulisan padayong mihimo og hot pursuit operation sa duha ka insedente samtang padayon ang case build up aron mailhan ang mga tulisan.( /EIM) (BANAT NEWS)