Natabunan og anapog patay

CEBU, Philippines - Patay nang nakuykoyan sa mga kauban ang 62-anyos nga mangubkubay og anapog human kini mataboni sa nahunlak nga yuta diha sa sitio Pasamanos barangay Dawis Sur lungsod sa Carmen niadtong Miyerkules sa alas 3:00 sa hapon.

Ang biktima nga naugkat ra usab sa iyang mga kaubanan apan patay na mao si Ernesto Usma, 62, molupyo sa barangay Guinsay siyudad sa Danao.

Matud ni SPO2 Simplicio Gibo, desk officer sa Carmen Police dihang nahinabi sa Banat News, subay sa imbestigasyon ang biktima ug mga kaubanan gisuholan sa usa ka Gloria Kemko nga nanag-iya sa luna sa pagkuykoy sa anapog.

Ang biktima maoy nagkubkob sa ubos samtang ang uban sa iyang mga kauban maoy tighakot sa mapuno nga sako sa anapog paingon sa gawas sa lungag.

Apan samtang naghatod sa mga nakubkob nga sinakong anapog ang mga kaubanan kalit nga nahunlak ang maong yuta ug natabunan ang biktima nga niadtong tungura naglingkod sa ilawom ug mipahuway.

Ang mga kauban pagkakita sa nahitabo daling  mipunit og pala ug gikuykoy ang biktima apan patay na kini dihang ilang naugkat human niini ila nalang gipahibalo ang kapolisan sa nahitabo. (BANATNEWS)