Duha ka kaso batok sa nanglabay'ng granada

CEBU, Philippines - Duha ka mga kaso ang posibleng isang-at sa kapulisan batok sa mga suspetsado sa paglabay’g granada sa magtiayon nga tag-iya’g karenderya niadtong Miyerkules sa hapon diha sa sitio Ponce 2 sa barangay Carreta siyudad sa Sugbu.

Si Sr. Supt. Melvin Ramon Buenafe, hepe sa Cebu City Police Office (CCPO) nagkanayon sa mga tigbalita nga kasong murder ug frustrated murder ang ilang ipasaka batok nila ni Eldie Prisco Mahinay, 40, taga sitio Cabancalan, Jubay Liloan ug Alvin Goc-ong Cabang, 24, taga sitio Fatima, Jubay Liloan.

Matud ni Buenafe ila sab iapil pagpasaka’g kaso si Enrique Ermac Bataluna, alyas ‘Eking’ nga maoy gitudlong mastermind sa maong kremin ug ang ikatulong kauban nila ni Mahinay ug Cabang nga nakaikyas sa hot pursuit operation.

Sa nasayran si Eduardo Natividad, 67, minyo, namatay pipila ka gutlo ang nakalabay sulod sa Cebu City Medical Center (CCMC) human nakaangko’g daghang samad sa lawas ug naputol ang walang kamot tungod sa pagbuto sa granada.

Ang iyang asawa nga si Rosita, 67, dili (Teresita) base sa unang migawas nga report, pabilin gihapong giatiman sa Velez Hospital lakip na sa iyang apo nga si Mark Vince Diola, 8-anyos human nakaangko’g samad sa ilang kalawasan ug sa batiis ngadto sa dapidapi apan luwas na hinuon sa peligro nga kahimtang.

Dunay dugang nakuha nga impormasyon sa mga imbestigador diha sa crime scene nga posibleng gipunit ni Eduardo ang granada sa sulod sa iyang karenderya apan gitangtang na ang pin niini maong mibuto diha sa iyang walang kamot.

Matud ni Buenafe sa miaging gabii dunay gihimong follow-up ang kapulisan ug sa giingong mastermind didto sa Liloan apan migawas nga negatibo kini.

Ilegal nga drugas ang gitutukang motibo sa paglabay og granada sa magtiayong Natividad human ang ilang umagad nga si Rodrigo Cansancio alyas ‘Badang’ giingong mitambling sa duha ka bultong shabu ni Bataluna.

Tungod niini wala na mag-anhaan si Cansancio sa Carreta hinungdan dunay mangita niyang mga lalaki anha sa karenderya sa iyang ugangang sila si Eduardo ug Rosita Natividad.

Matud ni Buenafe ang kapulisan sa Liloan mitug-an kaniya nga usa sa mga drug personality si Bataluna nga ilang gimonitor samtang si Mahinay nadakpan na sab kaniadto sa kapulisan tungod gihapon sa ginadiling drogas. (BANATNEWS)