Kaplag sa Sr. Sto. Niño sa NAVFORCEN malampuson

CEBU, Philippines -  Sa unang higayon miduaw ang imahen ni Sr. Sto. Niño sulod sa base militar sa Naval Forces Central (NAVFORCEN) sa barangay Looc dakbayan sa Lapulapu kagahapon sa buntag diin gisugat og mga debotos nga isip kabahin sa pagsaulog sa ‘Kaplag.’

Ang imahen giprosesyon gikan sa Basilica Minore del Santo Niño padulong sa wharf sa Malacañang sa Sugbu ug gisakay sa BRP Gen. Emilio Aguinaldo padulong sa maong base.

Pag-abot sa maong base gisugat kini sa mga opisyales sa Philippine Navy pinangulohan ni Commodore Zyril Carlos ug mga ginsakopan niini ug giprosesyon kini ngadto sa kapilya diin gihimo ang Santos nga Misa nga gipangulohan ni Bishop Leopoldo Tumulak, ang Military Bishop sa nasud.

Matud pa ni Fr. Tito Soquino ang “Kaplag” maoy pagpahinumdum kanato nga sa milabay’ng tuig 1565 Abril 28 maoy petsa sa pagkakaplag sa imahen sa Sr. Santo Niño nga naglutaw sa dagat dihang nadiskubrehan ni Juan Cabus, ang sundalo ni Miguel Lopez de Legaspi diin kauban niini si Fr. Andres de Urdaneta, usa ka paring Agustinian.

Sa unang higayon si Sr. Sto. Niño miduaw sa isla sa Mactan diin sukwahi kini sa gipahigayong fluvial procession matag tuig nga igo lamang molabay ang imahen sa Sto. Niño sa isla sa Mactan.

Matud pa ni Fr. Soquino kung ang Sr. Sto. Niño napalgan sa kadagatan base sa kasaysayan kini maoy ilang gihimong magbalantay sa kadagatan ug sa mga sakyanan sa kadagatan.

Atol sa maong seremonyas gibansagan ang imahen nga “El Kapitan Heneral del Sr. Sto Niño” isip maoy labaw sa tanang mga heneral sa pwersa militar sa kadagatan.

Ang imahen sa Sr. Sto. Niño nagpabilin sa maong kapilya sulod sa unom ka oras nga bukas sa mga debotong miadto aron mag-ampo.

Pormal nga gibalik ngadto sa Basilica Minore del Sto. Niño   alas 3:00 kagahapon sa hapon. (/EIM)  (BANAT NEWS)