Rama manumpa sa malacañang

CEBU, Philippines -  Gikatakdang molupad sunod semana si Mayor Michael Rama didto sa Malacañang aron manumpa atubangan mismo ni Presidente Benigno Aquino III.

Kalabot kini sa bag-ong posisyon nga gihuptan ni Rama isip pangulo sa Regional Development Council sa Rehiyon -7.

Kahinumduman nga naangkon ni Rama sa maong posisyon sa milabay nga buwan diin ang presidente mismo mihangop sa iyang pagkapili.

Nasayran nga dakong hagit kang Rama ang maong posisyon gumikan kay kinahanglan niya ang lapad nga mga proyekto kung diin magkahiusa ang mga lugar sa Rehiyon-7.   

Matapos ang termino ni Rama sa RDC karong 2013 ug sulod sa maong period, makigtigom si Rama sa mga opisyales sa mga Local Government Units sa rehiyon nga iyang gihuptan.

Target usab niya ang pag-umol og mga programa kung diin ang kadaghanan maoy maka-benepisyo niini.

Gisalikway hinuon sa mayor ang pangagpas nga moduol siya sa presidente aron mamarayeg og dugang programa sa siyudad.

Sumala pa ni Rama nga duolon lang niya ang mga gabinete ug ang ubang tawo nga duol ni Aquino ug dili direkta sa pangulo.

“Kabalo man ta nga busy kaayo si Noynoy, ang ato lang magkahiusa ang mga leaders sa Region-7 aron makahimo ta og nindot nga mga programa ,” matud pa sa mayor.( /EIM) (BANAT NEWS)