RORO nga barko nasangad sa Talisay

CEBU, Philippines -  Usa ka roll-on-roll-off nga barko ang nasangad niadtong Miyerkules sa gabii diha sa Pungaton Reef sa barangay Pooc, dakbayan sa Talisay.

Ang nahisgutang barko mao ang VG Shipping Lines diin base sa imbestigasyon ni PO2 Narciso Alforque sa Talisay City Police Station nga mibiya kini gikan sa Pier 3 dakbayan sa Sugbo mga alas 8:15 sa gabii niadtong Miyerkules ug paingon unta ngadto sa Oroquieta City apan naagi sa mabaw nga lugar diha sa Pungaton Reef hinungdan sa pagkasangad niini.

Wala hinuoy nasakitan o nakalas sa maong aksidente gawas lang sa nangagubang gasang diha sa ilawom.

Base usab sa imbestigasyon ni Alforque nga ang chief mate nga si Rodrigo Buligan maoy nagpadagan sa maong barko niadtong higayona tungod kay ang kapitan nga si Rolando Medija mi-break makadiyot aron mokaon.

Gikatahong si Medija mi-report sa maong hitabo mga pila na ka oras ang nakalabay human sila madiskubrehi sa mga sakop sa Fisherman Sea and Ecological Care (FISECA) kagahapon sa alas 5:00 sa buntag.

Sa pagsuwat niining balita ang walo ka pasahero ug ubang tripulante sa barko ang gitugotang makakanaog samtang ang VG Shipping Lines gikustodiya una sa Philippine Coast Guard aron mapaubos sa imbestigasyon.

Si Konsehal Bernard Odilao sa dakbayan sa Talisay, chairman sa council committee on environment nagkanayon nga ang siyudad mopadala og mga professional divers aron ma-assess ang danyos diha sa lugar human sa insidente.

“We will be doing the same procedures like we did with M/V Majuro. So right now, our divers will check the site to assess the damaged,” ni Odilao pa.

Kahinumduman nga ang M/V Majuro usa ka Chinese cargo vessel misangad kaniadtong Marso, 2009 diha sa Lagundi Reef sa barangay Poblacion.

Ang siyudad mipasaka og kasong kalapasan sa environmental law batok sa kapitan sa maong barko diha sa Talisay City Prosecutor’s Office apan ang maong kaso nabasura human nga ang kagamhanan sa siyudad napakyas sa pagduso og mga lig-ong kamatuoran kabahin sa insidente. (EIM) (BANAT NEWS)