Gilabay'g granada 1 patay, 2 angol

CEBU, Philippines - Namatay ang bana ug samaran usab ang asawa ug apo human sila labaya og granada sa upat ka tawo nga ilang customer sa karenderya atbang sa inilang motel sa Ponce 2, barangay Carreta siyudad sa Sugbo kagahapon ala 1:00 pasado sa hapon

Ang namatay mao si Eduardo ‘Ladie’ Natividad, 50, nga molupyo sa maong lugar, kansang walang kamot naputol, ug ang naangol mao ang iyang asawa nga si Teresita, 50, ug ang ilang apo nga si Mark Diola, 8.

Samtang duha sa upat ka mga kriminal nadakpan dayon sa kapolisan kinsa nailhang si Alvin Goc-ong Cabang, 24, nga taga Jubay, Fatima, sa lungsod sa Liloan, ug si Eldie Notadot Mahinay, 40, silingan usab ni Cabang.

Si Cabang didto hidakpi sa dakbayan sa Mandaue, samtang si Mahinay didto dakpi sa kapolisan sa lungsod sa Liloan.

Ang gitumbok nga utok sa maong paglabay og granada giila lang sa anggang Eking ug ang usa, wala pa hiilhi sa pagsuwat ning balita ug pulos pa sila gawasnon sa pagkakaron.

Usa ka 26-anyos nga saksi ug silingan sa mga biktima mitug-an sa Banat News nga nakadungog siya og lanog nga buto sulod sa tindahan sa magtiayong Natividad.

Iyang nakit-an ang lalaki nga nagsul-ob og puti nga t-shirt hinungdan nga iya kining gigukod didto sa terminal sa White Gold apan abtik kaayo kining misakay og mini bus.

Matud pa niya nga mibalik siya didto sa nahitaboan ug may nakuptan na usab siyang lalaki nga gituohan niyang kauban sa grupo nga mipabuto og granada apan iya usab kining nabuhian.

Si Marvin Diola igsoon ni Mark mitug-an sa mga tigbalita nga iyang nakit-an ang mga kriminal sa iyang paggawas gikan sa internetan tapad sa karenderya sa mga biktima.

Samtang si Maria Salome Diola anak sa magtiayong Natividad ug inahan usab ni Mark ug Marvin nagkanayon nga nag-ilis siya niadtong higayona kay padulong siyang molakaw apan iyang nadunggan ang singgit sa iyang amahan nga nagkanayon, “mobuto kana”.

Hinungdan nga midagan siya sa kusina sa karenderya ug wala magdugay mibuto ang Granada.

Matud ni Maria Salome nga niadtong Domingo iyang nadunggan ang iyang amahan (Eduardo) nga naghisgot nga adunay duha ka lalaking mga batan-on nga nangita sa iyang bayaw nga si Badang Cansancio tungod kay “nanambling” (terminolohiya sa wala moremit sa halin sa ginadiling drugas), apan si Badang wala na diha magpuyo sa Carreta human ang iyang asawang si Susan Cansancio nga anak sa magtiayong Natividad nadakpan sa buy bust operation sa kapulisan niadtong bulan sa Pebrero ug gani anaa pa kini karon sa City Jail.

Si Badang giingong ilado usab kining namaligya og ginadiling drugas sa maong lugar.

Tungod niini ang kapulisan nagtuong may kalambigitan sa panagbangi sa ginadiling drugas ang motibo sa paglabay og Granada sa mga biktima.

Si Chief Insp. Sara Jean Recla, hepe sa Crime Scene Investigation Unit (CSIU) nga nahinabi sa Banat News nagkanayon nga nakakuha sila og safety pin sa granada ug gagmay nga fragment o tipaka niini sulod sa karenderya apan dili pa siya makaingon kun unsang klaseha sa explosive ang mibuto.

Hinuon may posibilidad nga granada gyud ang gilabay sa mga kriminal.

Matud ni Recla nga namilit ang panit sa nakalas nga biktima sa bongbong sa ila mismong karenderya.

Si Mahinay maoy gitumbok nga maoy milabay’g granada base sa iyang giangkon dihang gisukit siya ni Sr. Supt. Melvin Ramon Buenafe, hepe sa CCPO. Gitug-an niya nga gi-hire sila ni Eking ug gisaarang bayran sila og   P10 mil.

Matud pa niya nga nagkita sila si Eking kagahapon sa buntag didto sa Liloan.

Samtang si Cabang dali nanghunaw tungod kay matud pa niya wala siyay labot ug igo ra siyang gidala ni Mahinay sa maong dapit nga wala masayud unsay ilang buhaton didto. (WC) (BANAT NEWS)