Kalibanga panahon sa grabeng kainit sa klima gikabalak-an
CEBU, Philippines - Gipahimangnoan ni Assistant City Epidemiologist Durinda Macasucol ang publiko nga magmabinantayon kanunay sa ilang panglawas ilabi na nga panahon karon sa summer gumikan kay magkakusog gyud ang kaso sa diarrhea.
“Kay summer man gud, daghan og outing, busa magbinantayon gyud sila sa ilang gipangaon,” nagkanayon si Macasucol.
Dugang pa niya nga kinahanglan nga batasanon sa tawo nga manghugas kanunay sa ilang kamot sa dili pa mokaon ug sigurohong limpiyo ang tubig nga imnon aron malikayan ang diarrhea.
Ang kaso sa diarrhea gikan sa buwan sa Enero hangtud sa Marso karong tuiga miabot ngadto sa 1, 344 ka kaso kumpara sa 657 sa susamang period sa milabay nga tuig.
Gipasabot ni Macasucol nga mitaas ang kaso sa diarrhea karong tuiga gumikan sa sunod-sunod nga pag-ulan sa nahisgutan nga period.
“Kung magsige og uwan, dako kaayo ang posibilidad nga ma-contaminated ang source sa tubig,” dugang pa ni Macasucol.
Nanawagan usab siya sa mga barangay officials nga mohatag og impormasyon sa ilang mga konstituwente bahin sa mga paagi paglikay sa diarrhea.
Gitambagan niya ang katawhan nga mas maayo nga magbalon og kaugalingon nila nga tubig sa nagkadaiya nila nga lakaw ug likayan usab ang pagkaon sa pungko-pungko nga nagpasad sa dalan nga walay tabon. (BANAT NEWS)
- Latest
- Trending
